حكاية الطير الابيض

حكاية الطير الأبيض2011-07-05 :: ازهر العبيدي ::

عدد القراء 30 إلى أعزائي الأصدقاء والقراء الكرام هذه حكاية الطير الأبيض من كتابي الجديد (الحكايات الشعبية الموصلية) وهي حكاية حزينة كنا ونحن صغارا نبكي مع بكاء الأميرة والأمير، أرجو أن تروق لكم مع تحياتي ومحبتي:كان وما كان على الله التكلان، كلمن علينو ذنب يقول التوبة وأستغفر الله. كان أكو فغد ملك وعندو بنت اميرة كثيغ كويسي (1) تقلّو للقمغ غيب وأنا بمكانك، وكانت كل يوم تقعد قدام الشباك وتمشّط شغعا الأصفغ الطويل بمشط من لولو ومرجان. فغد يوم غشعت من الشباك طيغ أبيض ويقف عالسجغا ويدحّق عليها، ظل هذا الطيغ الكويّس يجي كل يوم مثل هالوقت ويقف عالسجغا ويدحّق على بنت الملك كنينو يحبّا، وهيّا همّين الأميرة حبّتو للطيغ اللي غيشو أبيض مثل الثلج.فغد يوم وهيّا بيدا مشط اللولو والمرجان جط عليها الطيغ ونتش (2) المشط من أيدا وأنهزم، الأميرة أنقهغت عالمشط اللي أشتغانو أبوها من الهند ويكيت علينو لأنو مشط غالي عليها وكويّس. وأصطندغت (3) الطيغ ديرجع ثاني يوم ما رجع ثالث يوم ما رجع رابع يوم هم ما رجع، وظلّت تصطندغ يوم يجغ يوم وأسبوع يجغ أسبوع وما رجع، وظلّت الأميرة حزيني على مشطا ووحّشت الطيغ الحلو اللي كانت تتسلّى معانو كل يوم.حكت الأميرة لأمّا الملكة صحبة الطيغ والمشط، قلّلتلا لازم نقلّو لأبوكي وقللتلو للملك، قال هذا ما طيغ لازم هذا جنّي لو ساحغ كن عمل نفسو طيغ. البنت قللتلم أغيد تفتحولي حمام حتى أتونّس وأتسلّى بيها، وكل من تجي تسبح تحكيلي حكيي وتسبح أمبلاش (4). قام الملك بنى الحمام مثل ما غادت بنتو لأنو ما يغيد يخلّي خاطرا. وجو النسوان من جميع وجانب حتى يسبحون بالحمام أمبلاش، وكل وحدي تحكي حكيي والأميرة تسمع بلكي يجيها خبغ عن الطيغ.فغد يوم وحدي عجوز جت عالحمام وقللتلا للأميرة أنا عندي حكيي محّد كن حكاها، الأميرة ضاجت من كثغ الحكيات الما بيها ملح مال النسوان قللتلا: يمعودة (5) كل الحكيات كن سمعتوها. العجوز قللتلا أنت أسمعي هذي الحكيي وإذا ما عجبتكي لا تخلّيني أسبح ! قللتلا الأميرة يلا أحكي أش عدكي ؟ قللتلا العجوز فغد يوم غحتو عالشط من الفجغ دغسل حواس (6) ، غشعتو دابي (7) تطلع من الماي وتغوح عالبلد وترجع بعد شوية محمّلي مسواق، أنا مسكتو ذيلا دغشع ويصب تغوح ! أنشق الماي ونزلت عالدغيّج ( Cool

بقصغ كبيغ ما كن غشعتو مثلو، مفغوش محيفيغ كاشان وكرمان (9) وغراضو كلّتا من فضة وذهب، وغشعتو بالمطبخ سبع دسوت عالناغ ملياني أشكال وأرناك (10) الأكل، جيتو على دست الويحد دشيل القبغ (11) أغشع أسمع حس يقول:- يا دست أشعل أيدا ... سيدي لا يحبّا ولا يغيدا.الدست شعل أيدي قمتو سيّبتونو ومشيتو، بعد شوية غشعتو طيغ أبيض ينزل بالقصغ قمتو أختبيتو حتى لا يغشعني، شلح الطيغ جلدو طلع هذاك الشاب الحلو سبحان رب الخلقو والخالق أحسن. نزل الشاب عالبغكي سبح وأرتاح وأنمدت قدامو السفغة دياكل، مسك بيدو مشط من لولو ومرجان وقام يبكي ويقول:- يا من مشطا عندي وعيني لا تراها، يا طيور يا أشجار يا أنهار عينوني على نحبا وبكاها.طق من البكا وبكيو معانو حجاغ القصغ وغراضو والمويعين (12) والسجغ وكل من بالقصغ، وظلّوا على هل حال يبكون لمّن صاغ وقت النوم وناموا. ثاني يوم الصبح الدابي طلعت عالمسواق مسكتو ذيلا وطلعتو من الماي.هايي (13) الأميرة قالت ماكو غيغ هذا الطيغ الأبيض والمشط مشطي، وقللتلا للعجوز تفوت تسبح ومن طلعت قللتلا تاخذا على بلدا وتغشّعا المكان اللي طلعت منّو الدابي. غاحت مع العجوز وقعّدت على حيفة الشط من الفجغ، ولكان ينشق الشط وتطلع الدابي وبعد شوية ترجع محمّلي بالمسواق، قامت الأميرة مسكت ذيلا وفاتت معاها ببطن الأغض. غشعت نفسا مثل ما قالت العجوز ببطن قصغ كبيغ، قامت تفتل بالقصغ تتطّمش (14) على غراضو وأوداتو وجت عالمطبخ تغشع سبع دسوت (15) عالناغ، كشّفت ويحد من الدسوت سمعت حس يقول:- يا دست لا تشعل أيدا ... كوي سيدي يحبّا ويغيدا.تغشع بكل دست أكل شكل تمن وأيبرغ وشيخ محشي أكلت منّم لمّن شبعت، وأختبت قبل ما يجي الطيغ ويغشعا. بعد شوية صاغ الظهغ وجا الطيغ الأبيض وحط يم البغكي (16) ، شلح (17) جلدو طلع هذاك الشاب اللي أختو تعشقو، سبح وأرتاح وأنمدّت السفغة (18) دياكل، مسك بيدو مشط اللولو والمرجان وقام يبكي ويقول:- يا من مشطا عندي وعيني لا تراها ، يا طيور يا أشجار يا أنهار عينوني على نحبا ويكاها.هذا غشع القصغ والغراض والمويعين والسجغ كلاّ تضحك، زعل الشاب وقلّم ليش ما عتّبكون مثل كل مرة، هذولي (19) ظلّوا يضحكون. وطلعت الأميرة من مكانا وزتت (20) نفسا علينو وقللتلو:- لا عشتو عليك (21) ، لكن أنت ما طول هلقد (22) تحبني ليش ما أخذتني مثل ما أخذت المشط مالي ؟ قلاّ الشاب:- أبويي ما قبل وقلّي إذا هيّا بنت أوادم (23) وتحبّك وتغيدك تجي تدوّغ عليك.قام الشاب تزوّج عالأميرة وعاشوا أحسن عيشي.وكنا عدكم وجينا لو كان بيتنا قغيب كان جبنا كونيي زبيب ووزعناها حفني لعمو مشتاق وحفني لمحمد وحفني لسمير وحفني لسعاد دقومو نامومعاني الكلمات1. كويسي: جميلة.2. جط ونتش: هجم ونتش تعني خطف.3. أصطندغت: انتظرت.4. أمبلاش: مجاناً.5. يمعودة: يا هذه، تعبير موصلي للمخاطبة، ويقال للرجل يمعوّد إي يا هذا.6. حواس: ملابس.7. دابي: دابة وهي حيوان حمل حصان أو بغل أو حمار.8. عالدغيّج: على الدرج أو السلالم.9. كاشان وكرمان: أنواع من السجاد العجمي.10. أرناك: جمع رنك أي أنواع من الطعام.11. القبغ: غطاء القدر.12. المويعين: جمع ماعون أي إناء.13. هايي: هذه، إشارة للمؤنث في اللهجة الموصلية.14. تتطمّش: تتفرّج.15. دسوت: جمع دست أي قدر لطبخ الطعام.16. البغكي: بركة الماء.17. شلح: نزع أو خلع.18. السفغة: سفرة أو مائدة الطعام.19. هذولي: هؤلاء، إشارة لجمع المذكر والمؤنث في اللهجة الموصلية.20. زتت: رمت.21. لا عشتو عليك: لا عشت بعدك، تعبير عن الحب والدعاء بالعطف على الحبيب.22. ما طول هلقد: طالما تحبني بهذا القدر !23. بنت أوادم: تعبير يدل على طيب الأصل والمنبت.

تقييمك لجودة الموضوع

012345

أخبر صديقك